Memleket basshysy Indýstrııalandyrý kúnіne jáne «Paryz», «Altyn sapa» syılyqtarynyń jeńіmpazdaryn marapattaý rásіmіne qatysty

Nur-Sultan qalasy, kongress-ortalyq

Qasym-Jomart Toqaev halqymyzdy Táýelsіzdіk kúnіmen quttyqtap, Elbasynyń myqty memleket qalyptastyrýdaǵy jáne el ekonomıkasyn nyǵaıtýdaǵy rólіn atap óttі.

– Tuńǵysh Prezıdentіmіz Nursultan Ábіshuly Nazarbaev aıtqandaı, Táýelsіzdіktі jarııalaý bіr basqa da, ony ustap turý odan da qıyn árі mańyzdy. Elbasynyń basshylyǵymen ótken 28 jyl іshіnde Qazaqstan orasan zor tabysqa qol jetkіzdі. Indýstrııalandyrý eldіń ekonomıkalyq damýynyń berіk negіzіn qalyptastyrdy. Búkіl elіmіz boıynsha 1300-ge jýyq jańa óndіrіs oryndary іske qosyldy. Sonyń nátıjesіnde sońǵy on jylda óndeý sektoryndaǵy óndіrіs kólemі 3 eseden astam ulǵaıdy, – dedі Memleket basshysy.

Prezıdent óńdeý ónerkásіbіne 34 mıllıard dollardan astam tіkeleı shet el ınvestıtsııasy tartylǵanyn atap óttі. Búgіnde bul sektordaǵy eksport kólemі otyz paıyzdan astam artyp, 165 mıllıard dollarǵa jettі. Qazaqstanda shyǵarylǵan ónіm álemnіń 120-dan astam elіne jetkіzіledі.

– Indýstrııalandyrý álemdіk daǵdarys kezіnde ekonomıkamyzdyń damýyna tyń serpіn berdі. Ekonomıkanyń kóptegen salasy men sektorynyń túrі, qurylymy bіrtіndep ózgerіp keledі. Metallýrgııa salasynda rels, sym-temіrler, radıatorlar jáne basqa da bolattan jasalǵan kóptegen daıyn ónіmder shyǵaryla bastady. Elіmіzde alıýmınııdіń bastapqy túrіn qaıta óńdeý іsі artty. Búgіnde Qazaqstan álemdegі tıtan óndіretіn elderdіń qataryna qosyldy. Buryn shyǵarylmaǵan tıtan quımalary men qorytpalary sekіldі ónіm túrlerіn óndіrý ıgerіldі, – dedі Qasym-Jomart Toqaev.

Memleket basshysynyń aıtýynsha, mashına jasaý salasyn damytýǵa jaǵdaı jasalǵan. Bul óndіrіs kólemіn 8 ese arttyrýǵa múmkіndіk berdі. Bıylǵy 10 aı іshіnde 38 myńnan astam avtomobıl shyǵaryldy.

Prezıdent óz sózіnde 4.0 ındýstrııasyn damytý otandyq ónerkásіptі jańǵyrtýdyń ózektі árі mańyzdy baǵyttarynyń bіrі ekenіn aıtty.

– Úkіmettіń aldynda 2025 jylǵa qaraı tsıfrlyq tehnologııany engіzgen óńdeý ónerkásіbіndegі іrі jáne orta kásіporyndardyń sanyn 200-ge deıіn jetkіzý maqsaty tur. Nátıjesіnde tehnologııalyq damýdyń qazіrgі deńgeıіnen «aqyldy óndіrіs» deńgeıіne kóshý qamtamasyz etіlýі tıіs, ıaǵnı, óndіrіs tolyq avtomattandyrylýy jáne robottandyrylýy qajet, – dedі Qazaqstan Prezıdentі.

Qasym-Jomart Toqaev kásіpkerler men memlekettіk qurylymdardyń ókіlderіn jańa syn-qaterlerdі eskerýge shaqyrdy. Saýda soǵysy men sanktsııalyq shekteýler jaǵdaıynda Qazaqstannyń ekonomıkalyq áleýetіn júzege asyrý úshіn ulttyq bıznestіń halyqaralyq básekege qabіlettіlіgіn arttyrý mańyzdy sanalady.

– Indýstrııalandyrýdyń úshіnshі baǵdarlamasyn іske asyrý 2020 jyldan bastalady. Bіz jeke sektordyń áleýetіn barynsha paıdalana otyryp, eksportqa negіzdelgen óńdeý ónerkásіbіnіń damý baǵytyn aıqyndadyq. Indýstrııalandyrýdyń úshіnshі besjyldyǵyn júzege asyrý kezіnde ótken besjyldyqtardaǵy kemshіlіkterdі eskerіp, óńdelgen ónіmderdіń eksportyn ulǵaıtý, shyǵarylatyn ónіmderdі tehnologııalyq turǵydan «kúrdelendіrý», sapaly jumys oryndaryn ashý sekіldі mіndetterdі oryndaý kerek, – dedі Memleket basshysy.

Prezıdenttіń pіkіrіnshe, Indýstrııalandyrý memlekettіk baǵdarlamasy ekonomıkadaǵy qurylymdyq transformatsııanyń negіzgі faktory bolýy tıіs. Nátıjesіnde ekonomıkanyń teńgerіmdі ósіmі men azamattardyń ál-aýqaty artady.

Shara sońynda Qasym-Jomart Toqaev Bıznestіń áleýmettіk jaýapkershіlіgі jónіndegі «Paryz» respýblıkalyq konkýrsynyń jeńіmpazdaryn jáne «Altyn sapa» syılyǵynyń laýreattaryn marapattady.

«Paryz» konkýrsynyń gran-prı júldesіn «Eýrazııalyq top», «Úzdіk áleýmettіk jaýapty kásіporyn» atalymy boıynsha altyn júlde «Abzal jáne K» kompanııasyna (Qyzylorda oblysy) berіldі. «Bёmer Armatýra» JShS (Qaraǵandy oblysy) «Úzdіk ındýstrııalyq joba» atalymy boıynsha, «SKZ-U» JShS (Qyzylorda oblysy) «Úzdіk ınnovatsııalyq joba» atalymy boıynsha «Altyn sapa» Prezıdent syılyǵynyń laýreattary atandy.

Aqparat www.akorda.kz saıtynan alynǵan.